Foro Masa Crítica Coruña

xotengo · Registrado: 01 Jun 2007 Mensajes: 12

Leo en Galicia Hoxe

"A bicicleta
MARCELINO AGÍS VILLAVERDE

Un anuncio televisivo do Goberno de España conciencioume da necesidade de deixar o coche na casa para non contaminar o planeta e, de paso, aforrar o combustible que o país non produce. A urbanización onde vivo dista apenas tres quilometros da cidade e acordei facer a viaxe en bicicleta acotío. Ben preparado con casco, luvas, cazadora reflectante e gafas aerodinámicas, comecei a pedalear. É curioso o distinto que se ve o mundo subido a unha bicicleta. Decátaste, por exemplo, da inexistencia dun carril axeitado e de que non hai máis remedio que empregar a cuneta.

A cuneta recolle e almacena unha manchea de cousas que hai que ir esquivando para non esnafrarse: pedras, area, tapacubos, latas, parafusos, cristais e outros desperdicios guindados alegremente dende as fiestras dos automóbiles.

Logo un comproba ata que punto as fochancas e o mal estado da estrada, que dentro dun coche son practicamente imperceptibles, poden provocar un sismo respectable subido ó sillín dunha bicicleta. Por se fose pouco, algunhas cidades gardan sorpresas para os ciclistas. Na miña puxeron un cartel de gran tamaño, antes de entrar no núcleo urbano, para anunciar que faltan cen metros para ceder o paso.O problema é que o cartel cadra á altura dun ciclista adulto cando vai sentado na bici e, se non andas ben de reflexos, podes perder a cabeza (e non falo metaforicamente).

Para algúns condutores é un estorbo que vaia pola cuneta tocando os narices, un tipo raro, un inadaptado social. Para outros é simplemente invisible. Non sei que será peor! Eu non penso desistir. Seguirei pedaleando, non só para contribuír a mellora do medio, senón para atender o consello do Goberno de España. Por iso, querido lector, se comprobas que me atraso máis da conta en acudir a este recanto que nos reúne cada xoves debes pensar o peor. Eu marcharei coa clara conciencia do deber cumprido, agardando que no Ceo polo menos conten xa co carril bici. "

Xiana · Publicado: Vie Oct 19, 2007 2:28 am **Título del mensaje**:

Hahahahahaha, moi bo. Espero que ningún ciclista perda a cabeza pola razón que comenta... De existir ceo (que, non, nenos... o ceo non existe...) non só contarían cun entramado de carril bici, senón, que non existirían vehículos a motor!!! puidendo voar todo o tempo..., pra que precisas coche!!!!
_________________
Gravados Rupestres: Patrimonio da Humanidade!!